Vendime mbi agjërimin që kanë të bëjnë me mjekësinë

Gjykimi i pastrimit të dhëmbit tek doktori ose gërryerja e tij ose shkulja e tij gjatë agjërimit, si dhe përdorimi i gjilpërës mpirëse (anestezisë)."Asnjë nga këto që u përmendën më lart në pyetje nuk ndikojnë në saktësinë e agjërimit. Është diçka e falur por duhet të ruhet mos të gëlltisë diçka nga ilaçet apo gjaku. Po ashtu gjilpëra mpirëse nuk ndikon aspak në saktësinë e agjërimit, sepse ajo nuk i ngjason ushqimit dhe pijes dhe sepse origjina është saktësia dhe vlefshmëria e agjërimit".

Marrë nga fetuatë e shejh AbdulAziz bin Baz

A e prish agjërimin përdorimi i gjilpërës mpirëse në gojë për atë që do kurojë dhëmbët?

"Nuk ka problem që t'i bëhet agjëruesit gjilpërë mpirëse zonale, qoftë në gojë apo në pjesë tjetër të trupit për shkak të kurimit, sepse kjo lloj gjilpëre nuk është ushqyese".

Komisioni i përhershëm për studime dhe fetua
Kryetar: AbdulAziz bin Baz
Anëtar: AbdulAziz Ali Shejh
Anëtar: Salih el Feuzan
Anëtar: Bekr Abdullah Ebu Zejd

A ndikon procesi i larjes së veshkave në agjërim?

"I kemi shkruar drejtorit të spitalit "Mbreti Fajsal" dhe drejtorit të spitalit ushtarak në Rijad, që të na tregojnë rreth procesit të larjes së veshkave, lëndët kimike që përdoren në të dhe a ka diçka ushqyese në mesin e këtyre lëndëve, dhe përgjigja ishte si më poshtë:

'Procesi i larjes së veshkave do të thotë nxjerrje e gjakut në një aparaturë që quhet "veshkë artificiale", ku bëhet pastrimi i gjakut dhe i shtohen në të ca lëndë kimike si psh: sheqerna, kripëra, etj., dhe pastaj rikthehet përsëri në trupin e të sëmurit'.

Pas studimit që i bëri Komisioni i Fetuave realitetit të procesit të larjes së veshkave dha fetuanë se: procesi i lartpërmendur e prish agjërimin".

Kryetar: AbdulAziz bin Baz
Nënkryetar: AbduRrezak Afifi
Anëtar: Abdullah Gudejan

Marrë nga fetuatë e Komisionit me nr. 9944.

A duhet ta ndërpresë agjërimin nëse këtë ia këshillon mjeku i krishterë?

Pyetja:Unë jam i sëmurë rëndë, gjë e cila më ka detyruar të udhëtoj jashtë botës islame për t'u kuruar. Muaji i Ramazanit më gjeti atje dhe mjeku - i cili ishte i krishterë - më urdhëroi të mos agjëroja sepse ilaçet do më bënin dëm nëse nuk i shoqëroja me ushqim dhe ujë në veçanti, si dhe ma caktoi këtë lloj kure për një kohë të gjatë. Kur u ktheva, u konsultova me një mjek mysliman i cili gjithashtu më kërkoi që të mos agjëroj dhe këtë vit. Kam provuar të agjëroj por kjo gjë ma ka përkeqësuar gjendjen shëndetësore. Çfarë duhet të bëj kur kjo është situata?

Përgjigje:"O vëllai im, nuk ka problem ta lësh agjërimin për sa kohë që e ndjen veten sëmurë dhe agjërimi të mundon, duke qenë se edhe mjekët të kanë këshilluar që të mos agjërosh; nuk ka problem. I njëjti gjykim është nëse ke nevojë të marrësh ilaçe gjatë ditës - lejohet që të mos agjërosh sepse Allahu i Lartësuar thotë:

"Ndërsa ai që është i sëmurë apo në udhëtim e ka detyrë të agjërojë (kaza) aq ditë sa ka lënë pa agjëruar, në ditët e mëvonshme" (Bekare 185).

Edhe sikur të mos kesh aty pranë ndonjë mjek (për t'u konsultuar me të) dhe e ndjen veten se je sëmurë dhe e ke të vështirë në atë gjendje të agjërosh, të lejohet ty që të mos agjërosh për shkak të ekzistencës së sëmundjes, siç thuhet qartë në ajetin kur'anor. Sëmundja është justifikim i konsiderueshëm në sheriat siç është edhe udhëtimi. Sa herë që të gjesh vështirësi në agjërim për shkak të sëmundjes, të lejohet mos-agjërimi edhe nëse nuk këshillohesh paraprakisht me mjekun. Kuptohet e ke detyrë ta kryesh atë agjërim kaza kur të shërohesh nga sëmundja, qoftë dhe pas një kohe të gjatë, sepse Allahu i Lartësuar thotë:

"Ndërsa ai që është i sëmurë apo në udhëtim e ka detyrë t'i agjërojë (kaza) aq ditë sa ka lënë, në ditët e mëvonshme".

Kuptimi i ajetit është: E ka detyrë t'i agjërojë kaza aq ditë sa ka lënë pa agjëruar.

Pra ti, o vëllai im, kur të të shërojë Allahu dhe të kthehet shëndeti yt, kryeje agjërimin kaza pa pasur asnjë lloj sikleti në këtë gjë, uel hamdulilah. Përgëzohu me të mira, Allahu të shëroftë".

Marrë nga fetuatë e shejh AbdulAziz bin Baz.